Trump, inakusaran an Iran nin pagbalgar sa ceasefire sa Strait of Hormuz

Inakusaran ni US President Donald Trump an Iran nin “total violation” kan ceasefire makalihis na suboot magpaputok sa mga barko sa Strait of Hormuz.

Nagpatanid man si Trump na posibleng raoton kan Estados Unidos an mga tulay asin power plant kan Iran kun dai ini matugot sa alok kan kasunduan kan Amerika.

Sa saiyang pahayag sa internet, sinabi ni Trump na an saindang alok an “very fair and reasonable,” alagad kun magsayuma an Iran, handa suboot an Estados Unidos na punteryahon an importanteng imprastraktura kaini.

Sa ibong kan temporaryong pagbukas kan Strait of Hormuz kan nakaaging semana, apektado pa man liwat an shipping nin langis.

Nakapagrehistro man na insidente kun sain duwang barko an pinaputukan mantang nagdadangadang sa lugar.

Sa tahaw kaini, nakatalaan na magpasiring an mga representante kan Estados Unidos sa Pakistan para sa bagong orolay pangkatoninongan.