LEGAZPI CITY—Padagos an pangapudan kan grupo nin mga paratukdo na itao sinda an desente asin nakakabuhay na sweldo makalihis an mga report na nagkapirang paratukdo an nalubog sa saindang utang.
Segun ki Alliance of Concerned Teachers-Philippines National Chairperson Ruby Ana Bernardo, sa intrevista kan Bombo Radyo Legazpi, 75% kan mga paratukdo an lubog sa utang kun sain manipestasyon ini kan dae nakakabuhay na sweldo.
Basado sa saindang survey, na nag-uutang an mga paratukdo nganing may pambayad sa matrikula kan saindang mga aki, napipiritang mag-utang huli sa may idinarang kapamilya sa ospital o maski sinda mismo pag nagkakahelang, o kaya pambayad sa pagbakal kan mga piggamit sa pagtukdo kun kaya kalimitan sindang nagrarani sa mga lending institution.
Sinabi man kaini na siyam sa sampulong paratukdo an dae nakakakua nin nakakabuhay na sweldo kaya panahon na ngunyan nganing itaas kan gobierno an sweldo urog na nasa katahawan nin krisis an nacion.
Pangapiudan ni Bernardo na ihalangkaw an sweldo kan entry level kan mga paratukdo asin gibohon na P50,000; siring man an halangkawan an personal economic relief allowance sa P5,000.
Dugang kan opisyal na kun habo ni Presidente Bongbong Marcos na mapiritang magpasiring sa ibang nacion an mga paratukdo an dapat sindang pangatamanan.
Pangapudan man kan grupo na bako an three-term calendar o pagbabago sa curriculum an kaipuhan kan eskwelahan ngunyan kundi dugang na sweldo, tabang sa mga estudyante asin namamanwaan, magin an pagkalinga sa mga paratukdo
