LEGAZPI CITY—Aminado an sarong transport group na dakula man liwat an paghalangkaw kan presyo kan produktong petrolyo sa ibong kan bawas-presyo kaini ngunyan na aldaw nin Martes.
Segun ki Condor Piston Bicol President Ramon Rescovilla, sa intrevista kan Bombo Radyo Legazpi, harayuon pa an saindang nagastos sa pagbakal nin diesel kumpara sa rollback kaini.
Segun saiya na sa presente dakol na an dae nagpapasada huli sa napapasiring sana sa pagbakal nin gasolina an saindang nakukuang ganansya sa pagbiyahe.
Dugang ni Rescovilla na hasta sa ngunyan wara pa sindang update mapadapit sa saindang mareresibing ayuda gikan sa Department of Social Welfare and Development.
Mientrastanto, nagkukundusir man an saindang grupo nin community pantry nganing makatabang ini maski papano sa pangangaipuhan kan saindang mga kapwa drivers.
Pighayag man kaini na bukas sinda na magpartisipar sa gigibohong transport strike kan grupong MANIBELA sa Abril 15.
