LEGAZPI CITY – Naghahanda na an Department of Agriculture para sa pagtatao nin magkakanigong interventions sa mga paraooma asin parasisira sa provincia kan Albay na apektado kan krisis sa petrolyo.
Segun ki Department of Agriculture, Agricultural Program Coordinating Officer for Albay Florentino Ubalde Jr. na ibabarewas na ninda an fuel subsidy, hybrid asin inbred seeds na may fertilizers, asin mga benipisyaryo sa Presidential Assistance for Farmers and Fisherfolks.
Paglilinaw niya man na sa fuel subsidy, an mga natatadang resipyente kan taong 2023 asin 2024 an makakaresibi nin P3,000 mantang P5,000 man para sa mga kwalipikadong resipyente kan taong 2025.
Maabot man sa P604 million an ipig-alokar kan gobierno sa Presidential Assistance for Farmers and Fisherfolks sa rehiyon Bicol kun sain makakaresibi an mga labi 260,000 na kwalipikadong paraooma asin parasisira nin P2,325 kada saro.
Naglalaom man an opisyal na mababarewas na kan saindang ahensya an mga tabang asistensya sa mga kwalipikadong beneficiaries sa masunod na semana kun kaya pighihingoa nindang matapos an saindang opisyal na listahan.
Nag-apela man si Ubalde sa Lokal na Gobierno, paraooma asin parasisira sa provincia kan Albay na antabayanan an pagbabarewas kan tabang huli ta pighahalat na man sinda an opisyal na listahan siring man an mga pondong ibababa.
