LEGAZPI CITY – Karsel an bagsak kan sarong indibidwal makalihis makuwaan nin poco mas o menos 50 gramos nin ilegal na droga sa ikinasang anti-illegal drug operation sa Barangay Caroyroyan, Pili, Camarines Sur.
Segun ki Philippine Drug Enforcement Agency Albay Provincial Director Noe Briguel sa intrevista kan Bombo Radyo Legazpi na nangyari an transaksyon sa provincia kan Albay alagad naka-abot sa Camarines Sur an operasyon makalihis na agdahon an poseur-buyer na kuwaon an kontrabando sa pigrerentahang harong kan suspetsado.
Binisto suboot an suspetsado na si alyas “Roland”, 45 anyos, construction worker asin pigkokonsidera na high-value individual mantang nakumpiska sa saiyang pagsasadiri an pigtutubudang shabu na may standard drug price na nagkakantidad na P340,000.
Dakulang bagay man para sa sainda an pagkakadakop sa suspetsado urog nang nagtutubod sindang saro ini sa mga nagdadara kan ipinagbabawal na droga sa provincia kan Albay kun kaya nakipagtabangan na sinda sa Pili Municipal Police Station, PDEA Camarines Sur Provincial Office, asin iba pa.
Pigdugang pa kan opisyal na enkaso magpositibo sa forensic examination an mga nakumpisakang ebidensya, posibleng mahampang ini sa pagbalgar sa Sections 5 kan Article II kan Republic Act 9165 o Comprehensive Dangerous Drugs Act of 2002 na warang rekomendadong pyansa.
Pagdoon niya man na dae ninda sasaltuhon an siisay man na personang naggagamit asin nagpapabakal nin ilegal na droga, sa luwas man kan saindang area o mismong nasa saindang bisinidad huli ta ini an saindang trabaho.
Patanid ni Briguel sa mga naggagamit asin nagpapabakal nin ilegal na droga na pumundo na sa saindang ilegal na gawi huli ta dae nagpupurundo an mga law enforcement agencies sa pagsawata sa mga ini.
