LEGAZPI CITY- Pinirmahan na ni Sorsogon Governor Boboy Hamor an Executive Order No. 108-2026 na nagtatalaan nin sarong taon na moratorium sa official travel kan mga opisyal asin empleyado kan gobierno provincial.
Obheto kan nasabing kasuguan na masierto na an pondo kan gobierno an maitatagama sa mga serbisyong mas kinakaipuhan kan mga Sorsoganon.
Ini urog pa sa presenteng krisis na pinagkakahampang kan nacion sa presente.
Bako man sakop kan nasabing kasuguan an nagkapirang mga importanteng sitwasyon siring kan emergency response, disaster operations, asin mga aktibidad na may direktang kapakinabangan an publiko.
Magsasagibo na sana man nin mga alternatibong paagi siring kan virtual meetings, localized trainings, asin inter-agency coordination ngani na maipagpadagos man liwat an serbisyo sa publiko, na dae nangangaipo nin dakulang gastos.
