LEGAZPI CITY—Bilang parte kan Oplan “Harabas”, nagkundusir nin random drug testing an Philippine Drug Enforcement Agency Bicol katabang an the Land Transportation Office Regional Office V sa duwang pangenot na terminal partikularmente sa Bicol Central Terminal, Naga City asin Legazpi City Terminal, Legazpi City kan Marso 31.
Segun ki PDEA Bicol Public Information Officer Carlo Fernandez, sa intrevista kan Bombo Radyo Legazpi, nasa 172 indibidwal an nagsairarom sa drug testing kabale an mga bus drivers asin bus conductors, tricycle drivers, traditional asin modern jeepney drivers, asin UV Express drivers kun sain tulo digdi an nagpositibo kaiba an sarong bus driver asin duwang tricycle drivers.
Masairarom an mga nagpositibong indibidwal sa confirmatory test nganing masierto kun tunay sindang nagpositibo, alagad kun maaraman na liwat sindang magpositibo an i-eendorso sinda sa mga respektibong anti-drug abuse council kan saindang lokal na gobierno nganing matabangan sinda sa paglikay sa paggamit kan ipignagbabawal na droga.
Dugang ni Fernandez na sa lado kan LTO Bicol an ahensya na man na ini an madesisyon kun isususpendir o permanenteng i-revoke an lisensya kan nagpositibong indibidwal.
Tinawan-doon kaini na obheto ninda na mas magin salbado an pagbiyahe urog na ngunyan na Semana Santa na dakol an mga biyahero.
