Tahasang nagpatanid si retired Supreme Court Associate Justice Antonio Carpio sa gobyerno na posibleng magin dakulang bitag an pigbubusol na joint oil and gas explorations kan Pilipinas asin China sa West Philippine Sea.
Ginibo ni Carpio an pahayag sa saiyang pagbisita sa Pag-asa Island.
Segun sa dating mahistrado, an paglaog sa nasabing kasunduan an nangangahulugan nin pag-ako kan kondisyon kan Beijing na sinda an kagsadiri kan mga likas na yaman sa pigdidiskutiran na teritoryo.
An patanid na ini an kasunod kan pahayag ni Presidente Ferdinand Bongbong Marcos Jr. na bukas siya sa pagbalik kan negosasyon sa Beijing para sa joint energy project nganing maseguro an energy security kan nasyon sa tahaw kan nagpapadagos na tensyon sa Middle East.
Sa lado kan Department of Foreign Affairs (DFA), piglinaw ni Secretary Maria Theresa Lazaro na wara pang pormal na kasunduan alagad bukas an gobyerno sa posibilidad na ini.
Kinumpirmar man kan Foreign Affairs Undersecretary for Policy Leo M. Herrera-Lim na an mga orolay sa irarom kan 11th Bilateral Consultation Mechanism (BCM) sa Fujian, China an yaon pa sana sa exploratory stage.
Sa ibong na lado, pig-anunsyo kan Chinese Embassy sa Manila na may positibong progreso asin in-depth discussions an duwang nasyon dapit digdi.
Mantenidong sensitibo an isyu kan joint energy exploration huli sa isyu nin soberaniya.
Magigirumduman na kan 2016, ibinasura kan Permanent Court of Arbitration sa The Hague an claim kan Beijing huli ta wara suboot ini nin legal na basehan, sarong makasaysayan na desisyon na dae pa binisto kan China sagkod ngonian.
