LEGAZPI CITY – Binisita kan Social Security System an 15 establisyemento na igwang bayolasyon sa pagbabayad kan kontribusyon kan saindang mga empleyado.
Ini an kasunod kan ikinasa nindang Run After Contribution Evaders (R.A.C.E.) program kan ahensya sa Barangay Matacon, Polangui, Albay.
Segun ki Social Security System spokesperson Jeanette Mapa sa intrevista kan Bombo Radyo Legazpi na nagin matrayumpo an saindang operasyon huli sa pagigin bukas kan mga establisyemento sa pagcomply kan mga magkakanigong rekisitos.
Pinagirumduman man ninda an mga kagsadiri kan mga negosyo na labing importante na iparehistro an saindang establisyemento asin an saindang empleyado nganing magkaigwa nin social protection.
Sa oras man suboot na nakaparehistro na an mga ini, digdi na ninda maaraman kun pira an kinakaipuhan nindang bayadan sa ahensya.
Pigtawan doon man kan opisyal sa mga negosyante an importansya kan pagpaparehistro kan saindang mga empleyado sa laog nin 30 aldaw makalihis ining ma-hire nganing magkaigwa ini nin benipisyong makukuwa enkaso may dae piglalaoman na mangyari sa sainda.
Dugang pa ni Mapa na tatawan kan ahensya an mga nabisitang Business owners na mag-comply kan saindang rekisitos sa laog nin 15 aldaw sa bisa na man kan show cause order asin pwedesir na mahampang sa legal na aksyon enkaso magpalyar sa itinalaan na aldaw.
