Nagkapirang mga abogado asin indibidwal na pinangenotan ni Atty. Israelito Torreon an nagsangat nin petisyon sa Korte Suprema kontra sa Committee on Justice kan Kamara de Representantes.
Pigkwestyon ninda an legalidad o constitutionality kan nagpapadagos na impeachment hearing o process laban ki Bise Presidente Sara Duterte.
Partikularmenteng pigsangat ninda Atty. Torreon, Atty. Martin Delgra III, Atty. Victor Rodriguez asin iba pa an ‘petition for certiorari and prohibition’ na may kahagadan na magpaluwas nin Temporary Restraining Order an Korte Suprema.
Mawot nindang linawon kan Korte Suprema kun puedesir ipadagos kan komite an pagdangog sa mga reklamong impeachment kontra sa bise presidente.
Pighahagad man kan petitioner na mapugulan an Kongreso sa pagbisto kan ikatolo asin ikaapat na impeachment complaints bilang sufficient in substance asin sufficient in grounds.
Maski an implementasyon asin pagpaluwas nin dagdag na ‘subpoena, direktiba o orden’ mga kahagadan man na dapat pugulan asin dae na isagibo.
Isinumiter an petisyon sa Korte Suprema sa paagi kan ‘online submission o e-filing’ sa website kan korte.
