Nahahampang sa panibagong legal na orolay si dating Presidential Spokesperson Harry Roque makalihis na pormal na magsunad nin reklamong land grabbing an grupo nin mga paraooma hale sa Bataan.
Nagrani an nasa 17 paraooma sa National Bureau of Investigation (NBI) nganing ireklamo si Roque asin an First Bataan Mariveles Holdings Corporation, na ipigdadawit man sa operasyon kan POGO.
Segun sa mga nagrereklamo, nakatalaang dapat sinda matawan nin Certificate of Land Ownership Award kan Department of Agrarian Reform (DAR).
Siring man kan 2020, nadiskubre suboot ninda na nailipat na an pagrugaring kan daga sa First Bataan Mariveles Holdings Corp. nin warang permiso hale sa DAR.
Ipigdoon kan mga paraooma na naggamit suboot nin mga pinekeng dokumento sa paglipat kan labi sa 60 titulo nin daga.
Naglansar na nin imbestigasyon an NBI mapadapit digdi, na kinaiimbueltohan kan pocomas o menos 400 ektaryang lupa sa Mariveles, Bataan.
Wara pang pigluluwas na pahayag an kampo ni Roque mapadapit sa bagong reklamong ini.
Afuera sa land grabbing, nahahampang man si Roque sa kasong human trafficking katakod kan sinakyada na POGO hub sa Porac, Pampanga.
