LEGAZPI CITY – Aminado an Lokal na Gobierno kan Camalig, Albay na nakaka-apektar sa buhay kan mga Mayon evacuues an padagos na paghalangkaw kan presyo kan produktong petrolyo kawsa kan tensyon sa Middle East.
Sa intrevista kan Bombo Radyo Legazpi ki Mayor Caloy Baldo, kabale sa mga apektado iyo an mga nagdadara nin pagkakan sa banwaan kun kaya mahigot an saindang monitoring nganing maibitaran an labing paglangkaw kan presyo kan mga babarakalon.
May binilog na man suboot sindang team na may katuyuhang maglibot sa mga saudan, hardware, asin iba pang tindahan nganing hilingon kun nagsusurunod an mga ini sa price ceiling na ipigbugtak kan Department of Trade and Industry.
Pigpromesa niya man na magpapadagos an pagbabarewas ninda nin mga foodpacks sa saindang mga evacuues asin may mga tawo man na maray na boot nganing tabangan an saindang mga kababayan.
Segun pa sa opisyal na maarangkada na man sa saindang banwaan an pagbabarewas kan Department of Social Welfare and Development nin P5,000 cash assistance asin mga bulong na saindang ipapanao sa mga tricycle drivers pagkatapos kan holy week.
Pig-enganyar niya man an mga Tricycle Operators and Drivers’ Association (TODA) sa banwaan na magsumite nin request letter sa sangguniang bayan nganing tukaron an saindang kahagadan na dagdag-pasahe.
Pagdugang man ni Baldo na afuera sa mga tricycle drivers, nakikipagkoordinar man sinda sa Department of Agriculture nganing may maibarewas sindang tabang para sa mga residente nindang paraooma na apektado kan pag-aalburuto kan Bulkan asin paghalangkaw kan presyo kan produktong petrolyo.
