Nanindugan si Deputy Speaker Ronaldo Puno, miembro kan National Unity Party na an anuman na impeachment laban ki Sara Duterte an dapat basado sa malinaw asin solidong ebidensya.
Sinabi ni Puno na kaipuhan na syertuhon kan House Committee on Justice na igwa nin supisyenteng mga dokumento asin ebidensya antes ipadara sa senado an kaso para sa paglilitis.
Segun saiya, dapat igwa nin direktang financial evidence kun igwa man nin salang paggamit nin confidential funds sa opisina kan Bise Presidente asin kan Department of Education.
Dugang pa kaini, importanteng magpahiling nin pruweba arog kan mga record hale sa Anti-Money Laundering Council na an pondo nagpasiring sa personal na gamit o account kan Bise Presidente o kan saiyang mga paryentes o representante.
Kun wara nin siring na evidencia, sinabi ni Puno na maboto an saiyang partido na ibasura an reklamo.
Sinambit man kaini na dapat maingat na siyasaton an testimonya kan sarong testigo na nakakulong sa sarong suway na kaso, huli ta posibleng igwa ining motibo na maggibo nin mga salang pahayag.
Sa kabilugan, sinabi kan NUP na susuportaran sana ninda an impeachment kun igwang malinaw, dokumentado, asin beripikadong ebidensya nin mga pagbalgar.
