LEGAZPI CITY – Aminado an pirang tricycle driver sa provincia kan Catanduanes na napapagalan sinda sa labing pagtaas kan presyo kan produktong petrolyo na kawsa kan nagtitinding tensyon sa Middle East.
Segun ki Allan Abejo sa intrevista kan Bombo Radyo Legazpi na sa saindang lugar, nagkakawat na labi P80 sagkod P89 an presyo kan produktong petrolyo asin piglalaoman na mahalangkaw pa sa masunod na aldaw.
Dakulang epekto man suboot sainda ini urog na nang nag-aabot sa 38 kilometro an saindang pigba-byahe na katampad na sana an pampagasolina sa pigbayad sainda kan mga pasahero.
Paghistroya niya pa na maabot na sana sa P100 an saindang aldawang kita na baliktad sa P300 sagkod P400 na dati nindang nauuli kan dae pa nagpopoon an krisis sa produktong petrolyo.
Pigtaram pa kan naunambitang tricycle driver na dae sinda pwedesir magtaas nin singil sa pamasahe hangga’t dae ini pig-aaprubahan kan Lokal na Gobierno mantang hagad ninda na taasan an pamasahe na dae man mapapagalan an saindang mga pasahero.
Naglalaom man siya na magkatotoo asin maibarewas na sa sainda an ipigpromesang P5,000 na fuel subsidy na dakulang tabang nganing maibsan an saindang problema sa labing pagtaas sa presyo kan gasolina.
Alagad mantang pighahalat ninda an naunambitang subsidiya an padagos sinda sa paghahanap nin diskarte nganing dumakol an ganansyang nauuli ninda sa saindang pamilya.
Pagdoon pa ni Abejo maski anong gibuhon nindang pagtipid sa konsumo sa gasolina, kun dae man ini mababa, padagos sana sindang makayod kaysa wara panggastos sa saindang uru-aldaw na pangangaipuhanan.
