LEGAZPI CITY – Pigrereklamo kan sarong concerned citizen sa Bombo Radyo an nangyayaring double parking kan mga behikulo sa national highway sa Barangay Anislag, Daraga, Albay.
Paliwanag man ni Punong Barangay Jay-Ar Madrideo sa intrevista kan Bombo Radyo Legazpi na saro an double parking sa pigkakahampang nindang problema sa presente huli ta saro an saindang lugar sa mga mayor na agihan kan kalakaran sa banwaan.
Kadaklan suboot sa mga behikulong nakakapano sa saindang national highway iyo an mga para-tricycle na may mga ruta pasiring sa kataraid nindang Barangay kun kaya pighihingoa nindang masulusyunan ini kun sain nagsumite na sinda nin resolution sa Sangguniang Bayan.
Dugang pa niya na kun pagbabasehan an ley, mahigot na ipinagbabawal an pag-agi kan mga tricycle sa national highway alagad dae ini nai-papaotob huli ta mas pigpipili kan commuters tricycle kaysa sa ibang klase nin transportasyon.
Segun pa sa opisyal na nagkakawsa na nin dakulang abala an mga behikulong nag-double parking partikularmente na tuyong igwang klase an mga estudyante na nag-aagi na sa mismong tinampo huli ta okupado na an sidewalk.
Nakikipagtabangan na man suboot sinda sa Gobierno Lokal kan Daraga nganing masulusyunan an saindang problema kabale digdi an lakdang na gibuhan nin terminal an mga para-tricycle nganing magka-igwa nin pormal na paradahan na dae nakakabalahaw sa national highway.
Pangapodan ni Madrideo sa publikong luwas-laog sa saindang Barangay na magsunod sa tamang ordinansa mapadapit sa pagparada kan saindang mga behikulo nganing malikayan an pagbalgar asin pagkakaigwa nin penalidad.
