Pigsierto kan Malacañang na magtetenir na mapagmatyag asin preparado an gobyerno sa posibleng epekto kan nangyayaring iriwal sa Middle East, katakod kan direktiba ni Presidente Ferdinand Marcos Jr. sa mga ahensya kan gobyerno.
Segun ki Presidential Communications Office Undersecretary Claire Castro, pigduon kan Presidente na dae dapat magin kampante an gobyerno huli ta posibleng maapektaran an nasyon, lalo na sa lado kan presyo kan langis asin ekonomiya.
Sinabi man ni Castro na pigsierto kan Department of Energy (DOE) na supisyente an supply nin langis sa nasyon kun kaya dae nin rason nganing mag-panic buying.
Sa ibong kaini, padagos an pagbantay kan gobyerno sa sitwasyon nganing maprotehiran an publiko.
Sa direktiba kan Presidente, dapat sunudon kan mga oil companies an tamang schedule kan price adjustment asin ipinagbabawal an amay o bako awtorisadong paglangkaw kan presyo.
Pigpapahigot man kan DOLE, kaibahan an DILG asin an Philippine National Police, an inspeksyon sa mga gasolinahan nganing maibitaran an hoarding, profiteering, asin price manipulation kan supply.
Sa ibong na lado, nangapudan an gobyerno sa publiko na magtenir na kalmado mantang padagos an piggigibong lakdang kan gobyerno nganing masierto an supisyenteng supply nin langis asin patas na presyo sa bilog na nasyon.
