LEGAZPI CITY—Nangapudan an sarong transport group sa Albay na dapat na ibasura kan gobierno an excise tax asin Expanded Value Added Tax (EVAT) Law sa mga produktong petrolyo kasunod kan liwat na paghalangkaw kan presyo kaini.
Segun ki Condor PISTON Albay Acting Chairman Ramon Rescovilla, sa intrevista kan Bombo Radyo Legazpi, na afuera pa sa paghalangkaw kan presyo nin krudo an dakulang ganansya man an nawawara sainda huli sa mga nasabing ipigpataw na buwis.
Pagdoon niya na dapat tawan kan gobierno nin mga subsidiya an mga driver huli sa dakulang pondo an nakukua sa paagi kan VAT alagad warang naibabalik na tultol na serbisyo sa publiko.
Nanindugan man an opisyal na dapat maggibo na nin paagi an gobierno sa paghalangkaw kan presyo kan petrolyo makalihis an krisis sa Middle East huli sa igwa man nin gas resources an Pilipinas.
Afuera pa digdi, pangapudan man ni Rescovilla na repasuhon an Oil Deregulation Law huli sa wara man suboot na nahihilingan sa ley na ini asin pigkokontrol sana kan mga kompanya nin krudo sa paagi kan pagmo-monopolyo na labi man na nakakaapektar sa mga driver kan pampublikong transportasyon.
