Pigsugo kan Kamara de Representantes an Committee on Ethics and Privileges na magkondusir nin imbestigasyon sa pahayag ni Quezon City Representative Jesus “Bong” Suntay na kinondenar kan nagkapirang mambabatas na warang respeto sa mga kababaihan.
Nag-ugat an isyu sa House Committee on Justice hearing dapit sa impeachment complaints laban ki Bise Presidente Sara Duterte, kun saen ginamit ni Suntay na halimbawa an aktres na si Anne Curtis nganing ipaliwanag na dai dapat ikonsidera na aktwal na krimen an imahinasyon.
Nagkapirang mga mambabatas an makusog na nagkontra sa pahayag ni Suntay kaya tulos ining pinatanggal sa opisyal na rekord.
Sa privilege speech ni Representante Ann Matibag, nanindugan ini na dae dapat gibuhon na joke o pantasya an mga kababaihan sa laog kan Kongreso.
Pinangenotan ni San Juan Representative Ysabel Maria Zamora an mosyon na ipaapod si Suntay sa ethics panel asin magkaigwa nin hearing.
Inaprobaran ini nin warang pagtutol.
Naghagad nin dispensa si Suntay sa mga na-offend sa saiyang pahayag asin nagsabi na posibleng dae nagin maninigo an saiyang halimbawa, alagad irerespeto niya an resulta kan imbestigasyon kan Kamara.
