DILG, nagsunad nin kaso laban sa BFP chief huli sa suboot P14.7-M kickback sa ambulance procurement

Nagsangat an Department of the Interior and Local Government (DILG) nin kasong kriminal asin administratibo laban ki Bureau of Fire Protection (BFP) Chief Fire Director Jesus Fernandez katakod kan suboot pagresibe nin P14.7 milyones na kickbacks hale sa procurement nin mga ambulansya kan taong 2024.

Segun ki DILG Secretary Jonvic Remulla, isinangat an reklamo sa Office of the Ombudsman makalihis na madiskubre an suboot “systematic manipulation” sa bidding process sa pagbakal kan 132 na ambulansya kan BFP.

Basado sa imbestigasyon, si Fernandez suboot an chairperson kan BFP Bids and Awards Committee (BAC) kan ginibo an procurement.
Inakusaran siya na nag-ako nin kwarta hale sa sarong supplier karibay kan pagpagana sa bidding.

Pinangaranan man sa mga akusado an negosyanteng si Rosaverna Sangga kan Auto Zone Prime Distributors Inc., na suboot nagtao nin kwarta ki Fernandez.

Segun sa mga imbestigador, tolong beses suboot na itinao an kwarta sa paagi nin mga maleta na may laog na milyones de pesos.

Sinabi kan mga opisyales kan DILG na igwang testigo na personal na nakasaksi sa pagpreparar asin paghatod kan suboot “SOP” o kickback money sa opisyal kan BFP.

Huli kaini, nahahampang si Fernandez sa kasong direct bribery, malversation, conspiracy, asin pagbalgar sa Republic Act No. 3019 o Anti-Graft and Corrupt Practices Act.

Nahahampang man siya sa mga kasong administratibo arog kan grave misconduct, serious dishonesty, asin conduct prejudicial to the service.

Hinagad man kan DILG sa Ombudsman na temporaryong suspendiron si Fernandez mantang nagpapadagos pa an imbestigasyon ngani na masyerto an integridad kan kaso.

Mientrastanto, pig-iimbestigaran pa an nagkapirang miyembro kan BFP Bids and Awards Committee na posibleng may kinaaraman sa pigtutubudang kickback scheme.

Sa ngonian, wara pa nin pahayag si Fernandez asin Sangga dapit sa mga alegasyon.

Enot nang sinabi ni Remulla na nadiskubre kan saiyang departamento an suboot lakop na mga iregularidad sa laog kan BFP, kabali na an mga kuwestiyonableng aktibidad na posibleng nagkakantidad nin bilyones de pesos taon-taon.

Sinuportaran man kan BFP an kampanya kan gobyerno laban sa korapsyon.