LEGAZPI CITY-Pigsierto ni President Ferdinand Marcos Jr. sa mga negosyanteng Koreano na padagos an pagpapaotob kan administrasyon nin darakulang repormang pang-ekonomiya ngani mapakusog an kumpiyansa kan mga namumuhunan sa Pilipinas.
Isinagibo an pahayag makalihis an isinagibong Philippines-Korea Business Forum kun sain inatendiran ini kan Presidente kan Republic of Korea na si Lee Jae Myung.
Sinabi ni Marcos na hahalion kan gobierno an mga ulang sa bureaucracy, pababaon an gastosa pagnenegosyo, asin patibayon an kakayanan kan nacion na makipagsabayan sa pankinabang merkado.
Nabanggit man niya an nagkapirang ley na nagsususporta sa pagtalubo kan pamumuhunan, kaiba an CREATE MORE Act na nagtataong insentibo sa darakulang proyekto na dai mababa sa P50 bilyong puhunan o makakagibo nin 10,000 trabaho.
Pinunto man niya an Capital Markets Efficiency Promotion Act na nagbaba kan stock transaction tax poon 0.6% pasiring sa 0.1% ngani gibuhong mas episyente an capital market.
Naglalaom man an Presidente na magbubunga an forum para sa mas makusog asin makabuluhang koneksyon sa pagultanan kan Pilipinas asin South Korea, orog na sa mga sektor kan shipbuilding, nuclear energy, aerospace, electronics, asin biotechnology.
