LEGAZPI CITY – Piglinaw man kan mga opisyales kan Barangay Malobago, Daraga, Albay an reklamo kan residente nindang mga para-pala-pala na dae na sinda nakakapaghanap buhay huli sa mga darakulang quarry operator.
Segun ki Punong Barangay William Marbella sa intrevista kan Bombo Radyo Legazpi na lehitimo man an papeles kan pigrereklamong quarry operator asin naberipika man ninda an mga permit kaini sa gobierno provincial.
Paglilinaw niya man na pigtutugutan ninda an quarry sa lugar huli ta legal an operasyon kan mga ini alagad pwedesir suboot ipapundo an quarry kun may nagibong violation.
Dugang niya pa na an mismong quarry operator man an nagbabayad kan buwis kan lugar na itinao nganing pag-pwestuhan kan mga para-pala-pala asin nagkataon na tag-init ngonian kun kaya nagluluya an pigbubulos na materyales.
Pigtaram pa kan opisyal na basado sa saiyang pagkaka-aram, dating may papeles an para-pala-pala organization sa saindang Barangay alagad dae siya suboot syerto kun na-renew ninda ini huli ta dae na sinda nakakaresibi nin resibo gikan sa provincia.
Kahagadan man ni Marbella sa mga imbweltong lado na mag-olay nganing masulusyunan an problema asin dae na mag-arabutan sa social media an saindang mga akusasyon.
