LEGAZPI CITY-Liwat na magsasagibo an prosekusyon sa Department of Justice kan ‘preliminary investigation’ mapadapit sa reklamong plunder na kinakahampang ni dating senador na Bong Revilla Jr.
Ini makalihis na maurong huli sa isinangat na mosyon kan National Bureau of Investigation bilang ‘complainant’.
Isasagibo dapat an nasabing imbestigasyon kan Pebrero 20 alagad dai naidagos ngani makapagtao nin tsansa sa mga ‘respondents’ na kairiba sa mga inakusaran asin imbuelto suboot sa korapsyon.
Sa isinumiter na mosyon kan kawanihan, nagkaigwa nin panibagong mga pangaran o respondents sa ‘plunder case’ laban sa dating senador asin sa nagkapirang mga dating opisyal.
Marurumduman na ipigheras ni Justice Spokesperson Atty. Polo Martinez na apat na dating opisyal kan Department of Public Works and Highways an kabale sa mga pig-rereklamo kan ahensya, kaiba si dating Department of Public Works and Highways NCR engineers Denryl Caesar Cortuna, Manny Bulusan, Ruel Umali asin Arturo Gonzales Jr.
Dagdag pa kan Justice Spokesperson na posibleng magsangat si Revilla nin dugang na counter-affidavit mapadapit sa saiyang reklamo bilang tugon sa mga idinagdag na ebidensya asin respondents kan National Bureau of Investigation.
