LEGAZPI CITY- Labi an kaugmahan ni Catanduanes Governor Patrick Alain Azanza para sa mga atleta na padagos na nagdadara nin honra sa provincia sa kasagsagan kan nagpapadagos na Palarong Bicol 2026.
Katakod kaini, nagpasiring an gobernador sa ciudad kan Legazpi ngani na personal na ipaabot an cash prize para sa mga enot na nakapagbulsa nin medalya para sa island province.
Sa intrevista kan Bombo Radyo Legazpi kay Governor Azanza, sinabi kaini na an ipinaabot niyang cash prize an hali sa personal na bulsa asin suway pa sa nasa P300,000 na nakatagama hali sa provincia.
Naresibe kan swimmer na si Jhon Michael Nazareno an P10,000 makalihis maibulsa an gold medal asin P3,000 man para ki James Valenzuela na nakasungkit nin bronze medal.
Sinabi kan opisyal na inspirasyon an nasabing mga atleta para sa mga taga Catanduanes huli sa tibay sa larangan kan sports.
Mietras tanto, dakula man an paglaom kan gobernador na magigin magayon an performance kan provincia sa Palarong Bicol 2026 huli ta nahihiling niya an pagpupursige ka mga atleta asin mga delegado.
Photo courtesy: Bagwis Catanduanes
