Nagadan an Armed Forces chief of staff na si Abdolrahim Mousavi, kaiba an nagkapirang halangkaw na opisyales militar, pagkatapos na sakyadahon kan Estados Unidos asin Israel an Iran.
Base sa listahan na pinaluwas kan state TV, kabali man sa mga nagadan sinda Defense Minister Aziz Nasirzadeh, Revolutionary Guards chief Mohammad Pakpour, asin defense head Ali Shamkhani.
Susog sa report, nangyari an mga strike mantang pigsasagibo an “defense council meeting” laban sa mga pag-atake kan Estados Unidos asin Israel.
Mientrastanto, sa sarong suway na airstrike, nagadan man an Police intelligence chief kan Iran, si Gholamreza Rezaian.
Kasunod kaini, naglansar an Iran nin sarong bagong bugso nin mga missile asin drone attacks na pinuntirya an mga base militar kan Estados Unidos sa rehiyon asin sa Israel, na sinabi kaini na sarong lakdang bilang pagbalos sa mahiwas na pag-atake kan duwang nasyon na suboot nakagadan sa saindang supreme leader.
Kabali sa mga target iyo an 27 base kan Estados Unidos sa rehiyon, siring man an military headquarters kan Israel asin sarong defense industries complex sa Tel Aviv.
