Ipinahayag ni Presidente Ferdinand Marcos Jr. na warang Pilipino an naireport na nagadan o nalugadan sa ginibong joint combat operations kan US asin Israel laban sa Iran.
Ini an sa ibong kan mga bareta na an Supreme Leader kan Iran na si Ayatollah Ali Khamenei an nagadan sa sarong airstrike.
Sa sarong video message, nagtao nin pahayag si Presidente Marcos manungod sa nagtitinding tensyon sa Middle East makalihis na bombahon kan Israel asin Amerika an Iran, asin nagbalos an Iran sa paagi nin pag-atake sa mga base kan Amerika sa United Arab Emirates, Bahrain, Oman, asin Israel.
Huli kaini, segun sa Presidente, tulos na nagmonitor an gobyerno sa paagi kan mga embahada asin labor attachés sa rehiyon nganing maaraman an kamugtakan kan mga Pilipino duman.
Sinabi kan Hepe Ehekutibo na as of 9:00 nin aga ngonian na Domingo, warang mga Pilipino na nagadan o nalugadan sa mga nangyaring pag-atake.
Sinabi man kan Presidente na an kadaklan sa mga Pilipino yaon sa mga ligtas na lugar.
Naglikay man an mga Pilipino sa mga lugar na harani sa mga base militar kan Amerika.
Mientrastanto, pigmandohan ni Presidente Marcos an Department of Foreign Affairs (DFA) asin Department of Migrant Workers (DMW) na iimplementar an gabos na contingency plan ngani na maseguro an kaligtasan kan mga Pilipino sa Middle East kasunod kan mga bareta na may airstrikes sa Iran.
Sa sarong opisyal na pahayag, tinawan duon kan Presidente na “paramount” pinaka-importante an seguridad kan satong mga kababayan sa rehiyon.
Segun ki DFA Secretary Maria Theresa Lazaro, nasa “full alert” an mga embahada kan Pilipinas sa Tehran asin Tel Aviv, siring man sa mga nasyon kan Gulf Cooperation Council (GCC) kun saen dakol an Overseas Filipino Workers (OFWs).
Kinumpirmar kan DFA na sa ngonian wara pa nin report na may mga Pinoy na nalugadan o direktang apektado kan mga pagsabog.
Sa ibong kaini, mahigot na pinapagirumdom kan gobyerno an mga Pinoy na nasa naunambitang lugar na magtinir sa laog kan saindang mga harong asin maglikay sa mga pampublikong lugar mantang mainit an sitwasyon.
Nakisumaro man an Pilipinas sa pangapodan kan United Nations para sa tulos na diyalogo asin negosasyon nganing maibitaran an orog pang paglala kan tensyon sa pagultanan kan Israel, Amerika, asin Iran.
