LEGAZPI CITY—Nakatalaang magsagibo nin manlaen-laeng aktibidades an Legazpi City Veterinary Office katakod kan pag-obserbar kan Rabies Awareness Month ngonian na bulan kan Marso.
Segun ki Legazpi City Veterinary Office Head Dr. Emmanuel Estipona, sa intrevista kan Bombo Radyo Legazpi, pupuonan ini sa sarong assembly sa Sawangan Park ngonian na aldaw, Marso 1, susundan nin parade sagkod sa Ibalong Park kun sain digdi mangyayari an pet blessing asin mga programa hale sa manlaen-laeng ahensya ka gobierno siring kan direktor kan Department of Health, Department of Agriculture asin iba pa na konektado sa implementasyon kan rabies prevention and control sa bilog na provincia kan Albay.
Afuera sa Legazpi City, gigibohon man an nasabing aktibidad sa Sorsogon asin ciudad kan Naga.
Dugang kan opisyal na nagpapadagos an saindang innovations asin ibang istratehiya na pig-implementar nganing magin rabies-free an ciudad kan Legazpi.
Makundusir man an saindang opisina nin spay and neuter para sa mga atamang hayop sa Marso 19 sa pakikipagtabangan kan DA asin DOH.
Mientrastanto, pangapudan man ni Dr. Estipona sa gabos na pet owners an tamang pag-ataman sa mga atamang hayop kabale na an saindang physical asin psychological needs, pigkakan, istaran, asin pagdara sainda sa veterinarian para sa pagbabakuna.
