Nanindugan an defense counsel ni dating Presidente Rodrigo Duterte na si Atty. Nicholas Kaufmann, na imposibleng gamiton an mga nagin talumpati kaini bilang basehan nganing mapatunayan an criminal intensyon, mantang pigtuyaw man an suboot bako kumpletong presentasyon kan piskalya sa tunay na konteksto kan mga pahayag kan dating punong ehekutibo.
Mantang nagpapadagos an ikatolong aldaw kan confirmation of charges hearing sa kaso na Crimes Against Humanity, an abogado nagsambit kan ikaduwang diskurso na ginamit kan ICC Deputy Prosecutor Mame Mandiaye Niang sa saiyang opening statement.
An nasabing diskurso an manungod sa suboot pag-ako ni Duterte nin responsibilidad asin pagtuga na poprotehiran an mga rogue officers sa prosekusyon.
Segun sa depensa, nagkapirang parte sana kan speech kan presidente an pigpresentar kan Deputy Prosecutor.
Alagad, tinawan duon kan kampo ni Duterte na igwang importanteng parte na tuyong hinale sa prosekusyon.
Ipinahieling kan abogado an minasunod na pahayag hale sa parehong diskurso kun saen malinaw na pigsugo kan dating presidente an mga awtoridad na enuton an peaceful arrests.
Kun magigirumduman, ipinaliwanag kan depensa na sa ibong kan bisto an dating presidente sa saiyang maisog na pagtaram, an kabilogan na mensahe kan nasabing direktiba malinaw na sarong pag-engganyar sa lawful self-defense.
Segun sa abogado, mahihiling sa bilog na pahayag na pigtutugutan sana an paggamit nin pwersa kun igwa nin violent resistance na nagbubugtak sa peligro kan buhay kan mga pulis, asin patunay ini na dae ini ipinagsugo kan nakaaging administrasyon na may criminal na intensyon.
