LEGAZPI CITY—Katakod kan komemorasyon kan ika-40 taon kan EDSA People Power Revolution, nagin sentro kan mga nagprotestang grupo sa manlaen-laeng parte kan Bicol an pangapudan kontra sa kurapsyon, katiosan asin burukrata-kapitalismo sa nacion.
Kabale sa mga lugar na isinagibo an mga hiro protesta sa ciudad kan Legazpi asin ciudad kan Naga.
Segun ki Bicolana Gabriela Spokesperson Jen Nagrampa, sa intrevista kan Bombo Radyo Legazpi, ini huli sa an sistema sa gobierno an gari bako na demokrasya na nangyayari kundi “kleptocracy” o boot-sabihon piggagamit an posisyon sa gobierno nganing makapaghabon sa kaban ng bayan.
Nanindugan an grupo na dapat ipadagos na ikurahaw kan namamanwaan sa mga nasabing orolay huli sa dapat igwang may manimbag orog na bako sana sadit na politiko kundi maski an pinakanamamayo kan nacion an nadadawit sa isyu kan korapsyon.
Afuera digdi, pangapudan man ninda an isyu sa land grabbing kan nagkapirang politiko asin an pagtanggal sa 12% VAT kan gobierno.
Mientrastanto, sinabi man ni Nagrampa na warang kolor an isinagibong protesta huli sa an ipinaglalaban digdi an ipinaglaban kan kaitong panahon na mas maaraman pa asin maipasa pa sa mga masunod na henerasyon na kun saen dae sana natatapos sa pagkomerar sa EDSA kundi padagos na pag-adalan an historya urog na sa ngunyan na kinakaipuhang maghiro kan namamanwaan.
