Mantang luway-luway na nagdadangadang an eleksyon asin an iba nagdedeklara na madalagan sinda sa 2028 elections.
Nanindugan si Senate President Pro Tempore Panfilo “Ping” Lacson na magtetenir na pinakadakulang agyat an kurapsyon sa siisay man na gustong mamayo sa nasyon.
Segun ki Lacson, antes matapos an saiyang termino sa gobyerno sa Hunyo 2031, naglalaom sana ini na mangibabaw sa mga masunod na dekada kun ano an tama para sa nasyon.
Nagtutubod suboot siya na an korapsyon iyo an pinakadakulang ulang sa pagguno kan pag-uswag asin pag-asenso kan ekonomiya na maninigo sa mga Pilipino.
Ini an sinabi ni Lacson makalihis na ianunsyo ni Vice President Sara Duterte kan Miyerkules, Pebrero 18, an saiyang intensyon na magdalagan bilang presidente sa 2028.
Katakod kaini, sinabi kan senador na an lambang Pilipino na kwalipikado sa irarom kan Konstitusyon igwa nin deretsos na magdalagan sa arin man na elihidong posisyon.
Igwa suboot nin kanya-kanyang rason an Bise Presidente asin an saiyang mga advisors sa saiyang amay na pagdeklarar.
Alagad, sinabi ni Lacson na pwedesir siyang mag-ofresir nin marhay na kamawotan asin Goodluck ki Duterte asin sa sisay man na magdesisyon na magdalagan nganing pamayohan an Pilipinas.
Mientrastanto, nag-anunsyo man an kinonsiderang “United Opposition” na antes matapos an taon mapaluwas sinda nin mga listahan kan mga kandidato na madalagan para sa saindang hanay sa 2028 elections.
