Dating Albay Rep. Salceda sinabing sarong ‘misguided gamble’ an pagdeklara ni VP Sara sa 2028

Nagtutubod si dating Albay Representative Joey Salceda na sarong “misguided gamble” o salang pagsusugal an amay na pag-anunsiyo ni VP Sara Duterte kan saiyang pagdalagan bilang presidente sa 2028.

Segun ki Salceda, bako napapanahon asin dae kinakaipuhan an siring na pahayag huli ta magtetenir sa pwesto si Presidente Ferdinand Marcos Jr. sagkod sa Hunyo 2028.

Si Salceda an minsang nagkampanya asin nagsuporta sa nasyonal na ambisyon ni Duterte kan 2022.

Sa sarong media forum sa Quezon City, sinabi ni Salceda na sa ibong kan nakatrabaho na niya si Duterte dati, pigkonsiderar niya na “ill-advised move” an amay na pagdeklarar kan saiyang kandidatura.

Mas nagigin makusog suboot an sarong presidential bid kun ini an gikan sa sarong spontaneous public call asin bako sa amay na pagposisyon.

Ipinunto man niya na kan 2022, saro siya sa mga nag-engganyar ki Duterte na magdalagan bilang presidente.

Dae pa sana nahahaloy, pig-anunsyo ni Duterte an saiyang plano na magdalagan sa 2028 sa tahaw kan mga impeachment complaints na isinangat laban saiya sa Kamara asin an hearing sa International Criminal Court manungod sa imbestigasyon sa saiyang ama na si dating Presidente Rodrigo Duterte manungod sa mga suboot crimes against humanity na may kinaaraman sa kampanya kontra sa iligal na droga.