LEGAZPI CITY – Nakipag-olay na an mga opisyales kan Barangay Anoling sa banwaan kan Camalig, Albay sa manhamiento kan Camalig National High School bilang preparasyon enkasong maglala an sitwasyon kan Bulkang Mayon na presenteng nasa alert level 3 status.
Segun ki Punong Barangay Mia Alemania sa intrevista kan Bombo Radyo Legazpi na ginibo ninda an nasabing lakdang nganing magin sestimatiko an saindang pagpapa-ebakwar kan saindang mga residenteng naka-istar sa extended danger zones urog na kun magsakat sa Alert Level 4 status an Bulkan.
Sa presente kaya may mga residentes kan Barangay Anoling asin Barangay Cabangan na naka-istar sa laog kan 6KM permanent danger zone an paramientras na nagtetenir sa Camalig National High School.
Basado man sa saindang datos, pwedesir na i-ebakwar an 171 pamilya sa saindang lugar sa na-identipikar nindang 20 classrooms asin covered court kan eskwelahan enkasong maglala an sitwasyon kan Bulkang Mayon.
Pigtaram pa kan opisyal na sa oras na ma-ebakwar an saindang mga residente, pwedesir na magkaigwa nin problema sinda sa supply nin tubig urog na kun magdakol na an numero kan mga evacuees sa eskwelahan mantang Lokal na gobierno na an bahala sa supply kan kuryente.
Nakipag-olay na man siya sa ibang opisyales kan ibang barangay sa saindang banwaan nganing maghagad nin tabang arug kan pagpapagamit kan saindang mga service vehicles sa oras na magsagibo na sinda nin evacuation effort.
Afuera kaini an nakapagsagibo na sinda nin psychosocial intervention sa mga aking nasa evacuation centers na apektado kan nagpapadagos na aktibidad kan Bulkang Mayon nganing mabawasan an saindang trauma asin regular na nagsasagibo nin zumba sa saindang mga residenteng nakatenir sa Tagaytay Elementary School.
Pagdoon man ni Alemania na may iba sindang residenteng naka-istar sa extended danger zones na nangangapodan nang i-ebakwar sinda makalihis an pagbagsak kan mga abo kan nakaaging aldaw alagad nasa Lokal na gobierno na suboot an desisyon dapit digdi.
