LEGAZPI CITY – Ipig-oorgolyo kan manhamiento kan Camalig National High School an nagunong trayumpo kan saindang mga estudyante sa prestihiyosong International Science and Mathematics Olympiads.
Segun ki Camalig National High School Principal Roy Nipas sa intrevista kan Bombo Radyo Legazpi na huli sa honrang ipigtao kan saindang mga estudyante, pigbisto an saindang eskwelahan komo Most Outstanding School kan Math Olympiads Training League, Inc. (MOTLI).
Pagdoon niya na sa naunambitang kompetisyon, nakakuwa an saindang mga estudyante nin kabilugang 26 gold medals, 4 silver medals asin 7 bronze medals mantang an saindang eskwelahan sana sa enterong School division kan Albay an natawan kan Most Outstanding School award.
Pagheras niya man na bako na sana suboot pang-school, district, o maski pang-municipal level sagkod sa national level an tibay kan saindang mga estudyante kundi kaya na nindang mamayagpag sa international level.
Aminado man an opisyal na antes an trayumpo, dakol man na pinag-agihan kan saindang mga paratukdo na tukduan an saindang mga estudyante na ilalaban sa prestihiyosong International competition.
Ikinabigla niya man an suportang ipinahiling kan mga magurang kan mga award-winning students huli ta sinda na an nagbayad sa mga ticket kan saindang mga aki asin nag-iba nganing mag-atendir sa awarding ceremony.
Maugma man siya huli ta nabibisto na an Camalig National High School bako sana sa international competition kundi pati na man sa robotic competition huli ta may ipinadara sindang mga estudyante nganing lumaban sa robotics.
Pigtaram pa ni Nipas na plano kan Gobierno Lokal na salidahan an pangaran kan Camalig National High School pasiring sa Camalig National Science High School bilang patunay kan saindang trayumpo sa International scene.
