LEGAZPI CITY – Kinaipuhan na maglipat sa mga tent an mga internally displaced persons huli sa nagpapadagos na aktibidad kan Bulkang Mayon kan Barangay Calbayog, Malilipot, Albay na nagtetenir sa elementary school kan Barangay San Jose kan kaparehong banwaan.
Sa intrevista kan Bombo Radyo Legazpi ki Punong Barangay Gilbert Bolaños kan Barangay Calbayog, sinabi kaini na kinakaipuhan na ilipat an saindang residentes huli ta gagamiton an mga classroom sa pagbabalik kan klase.
Sa presente an maabot sa 271 families an paramientras na nagtetenir sa elementary school mantang 107 na pamilya an nagtetenir sa high school kan Barangay San Jose na gikan sa saindang mga residenteng nasa laog kan 6KM permanent danger zone.
Kabale suboot sa mga pigkakahampang na kadifisilan kan saindang Mayon evacuees iyo an pag-abot sa pasilidad arug kan comfort rooms, matuturugan, kusina, asin tubig.
Segun pa sa opisyal na uminabot na sa 129 na mga tents an ipigbugtak sa San Jose elementary school asin piglalaoman na matatapos an paglilipat nganing tulos nang mabuksan an mga classroom para sa mga estudyante.
Kahagadan man ni Bolaños sa gobierno na matabangan pa an saindang mga residente asin dae sinda pagpabayaan urog nang wara sindang malalaoman ngonian na nag-aalburuto an Bulkang Mayon.
