LEGAZPI CITY – Ipinagbawal na kan Sangguniang Bayan ng Daraga, Albay paggamit kan mariribok na modified muffler o open asin exhaust pipes sa mga motorsiklo makalihis na magin ganap nang ordinansa an “Anti-Modified “Open” Muffler and Exhaust Pipe Ordinance of Daraga”.
Segun ki Daraga Municipal Councilor Atty. Ian Macasinag sa intrevista kan Bombo Radyo Legazpi na saro sa mga rason kan pagpasa kan ordinansa iyo an pagkonsiderar kan mga tanog kan tambutso na public nuisance urog na tuyong banggi.
Punto niya na bako sana sarong tawo an naapektaran kan labing ribok kan mga open muffler kundi an mga komunidad na pig-aagihan kan motor na nakakaapekto man sa salud urog na kun nasa katahawan an mga ini kan saindang pagkaturog.
Nagkasararo man suboot an gabos na mga Barangay na saro ini sa mga nagkakawsa nin ribok sa saindang lugar sa ginibo nindang public hearning mapadapit sa naunambitang ordinansa.
Pigtaram pa kan opisyal na mapapa-otob na an “Anti-Modified “Open” Muffler and Exhaust Pipe Ordinance of Daraga” sa oras na ma-aprubahan kan Sangguniang Panlalawigan kan Albay makalihis na mapirmahan man ni Mayor Vic Perete.
Pagdoon niya na may mga pirang grupo na dismayado sa pagpasa kan ordinansa alagad pig-iisip niya sana suboot an karahayan kan kadaklan asin ipapasunod an mga polisiya kan ley.
Kahagadan ni Macasinag sa mga motorista na magsunod na sana sa ordinansa nganing dae na mahampang an mga ini sa magkakanigong penalidad.
