LEGAZPI CITY – Nagtetenir na halaba an mga pila kan mga truck sa pantalan kan banwaan kan Pioduran, Albay na nagpoporbar na makasakay sa mga roro nganing makapasiring sa mga lugar kan Visayas asin Mindanao.
Segun ki Pioduran MDRRMO Head Noel Ordoña sa intrevista kan Bombo Radyo Legazpi na nagpoon an pagruso kan mga truck huli sa paramientras na pagsarado asin paglimita sa pag-agi kan mga behikulo sa San Juanico Bridge kan nakaaging taon.
Punto niya na sa ibong kan may mga shipping lines na nag-ooperate sa Pioduran port alagad saro sana an solamenteng may byahe na may mga connecting trips pasiring sa cebu na nagigin rason kan paghalaba kan pila.
Paglilinaw niya man na dae man sinda nagpapabaya huli ta piggigibo ninda an gabos na pwedesir na paagi nganing mabawasan an pagdakol kan mga pila kan trucks na nakaka-apektar sa sitwasyon kan trapiko sa mga national highway.
Nagmamawot man an opisyal na magsagibo nin pag-oolay kabale an Maritime Industry Authority, Philippine Ports Authority, mga shipping lines, lokal na gobierno kan Pioduran, asin Gobierno provincial kan Albay nganing masulusyunan an presenteng problema.
Sa ibong kaini an wara man sindang nairehistrong dae piglalaomang insidente alagad nagtetenir na kadugangang problema an basurang ipigwawalat kan mga stranded na mga cargo truck.
Nangapodan man si Ordoña sa mga ahensya kan gobierno na tabangan sinda sa pagdakol kan mga truck na nagpoporbar na makasakay sa saindang pantalan.
