LEGAZPI CITY—Nakatalaang magkundusir nin psychological first aid an Department of Education – Albay sa mga apektadong estudyante huli kan presenteng aktibidad kan bulkang Mayon.
Segun ki Schools Division Office – Albay Spokesperson Froilan Tena, sa intrevista kan Bombo Radyo Legazpi, naka-iskedyul na an mga nurses asin personahes kan Disaster Risk Reduction and Management na magkundusir kan nasabing lakdang sa San Jose Elementary School sa banwaan kan Malilipot, Albay ngunyan na aldaw nin Huwebes, Enero 22.
Dugang kan opisyal na maikot an mga naunambitang personahes sa gabos na evacuation centers sa provincia nganing isagibo an psychological first aid para sa mga estudyante.
Mientrastanto, nagpapasasalamat man an opisyal sa mga paratukdo na padagos na nagbabarewas nin dekalidad na edukasyon sa ibong kan kalamidad na kawsa kan pag-alburoto kan bulkan.
Mensahe man niya sa mga estudyante na dae paggibohon na rason na sa ibong kan yaon sa evacuation center an dapat na ipagpadagos man liwat an saindang pag-aadal, asin kinakaipuhan an pasensya asin pagsabot sa sitwasyon.
