LEGAZPI CITY—Presenteng ipigluluwas kan Albay Provincial Veterinary Office an mga atamang hayop na yaon sa laog kan 6-kilometer permanent danger zone kan Bulkang Mayon.
Segun ki Albay Provincial Veterinary Office Head Dr. Pancho Mella, sa intrevista kan Bombo Radyo Legazpi, igwa sinda nin anom na pooling sites sa duwang banwaan kan Albay kun saen paramientras na pigpapa-ebakwar an mga nasabing hayop.
May lima sindang pooling sites sa banwaan ka Daraga, siring kan Matnog Animal Pooling Site, Bañadero Animal Pooling Site, Mi-isi Animal Pooling Site, asin duwang pooling sites sa Barangay Budiao.
Igwa man nin pooling sites sa banwaan kan Guinobatan siring kan Doña Tomasa, mantang an saro pang lugar sa nasabing banwaan an ipapadagos pa ngunyan na aldaw nin Huwebes, Enero 22.
Pighayag kan opisyal na nasa labi 226 hayop na an naibugtak sa mga naunambitang mga pooling sites, kabale an 115 baka, 102 na karabaw, asin 9 na kambing—kun saen nasa 87 livestock farmers an may kagsadiri kan mga ini.
Mensahe man ni Mella sa may mga atamang hayop na kaipuhan an saindang kooperasyon sa pagpa-ebakwar kan mga ini, huli sa importante an animal welfare asin makaligtas sa anumang huma kan bulkang Mayon.
