LEGAZPI CITY—Nagkundusir na nin pre-emptive evacaution sa mga residentes na sakop kan Mayon Unit area huli sa posibleng lahar flow dara kan mga pag-uuran sa banwaan nin Daraga.
Segun ki Daraga Municipal Disaster Risk Reduction and Management Office Head Engineer Bim Dineros, sa intrevista kan Bombo Radyo Legazpi, kabale sa mga ipinaebakwar na mga residentes an gikan sa Barangay Budiao, Bañadero, Malobago, Matnog, asin Barangay Busay.
Delikado an mga nasabing barangay sa huma nin lahar flow urog na harani an mga ini sa river channels siring kan Mi-isi gully asin nasa pamitisan kan bulkang Mayon.
Dugang ni Dineros, na kabale sa mga ginamit na rescue vehicles sa pagpapaebakwar an gikan sa Philippine Army, PNP, Bureau of Fire Protection magin sa lokal na gobierno kan Daraga.
Piglalaoman na maabot sa 700 sagkod 800 na pamilya an mapapaebakwar sa nasambitang banwaan.
Mientrastanto, nagpagiromdom man an opisyal sa mga residentes na magdangog sa mga pig-aabiso kan mga otoridad nganing dae mabugtak sa alanganin o peligro an saindang buhay.
