LEGAZPI CITY—Piglalaoman na maharani sa sirangang parte kan rehiyong Bicol partikularmente sa isla kan provincia kan Catanduanes ngunyan na Sabado, Enero 17, antes saagang Domingo, Enero 18 an pigbabantayang bagyong Ada.
Segun ki Catanduanes Weather Specialist Jun Pantino, sa intrevista kan Bombo Radyo Legazpi, kun dae mabago an direksyon kan bagyo an posibleng magtama ini sa nasambitang provincia sa Sabado nin hapon o aldaw nin Domingo.
Dugang niya na dakol na mareresibing mga pag-uuran na nagpapakol sa 100 millimeters sagkod 200 millimeters an mga lugar na aagihan kan bagyo partikularmente an Albay asin sirangang parte kan Bicol.
Tinawan-doon man kan opisyal na pag-abot nin aldaw na Lunes, Enero 19, piglalaoman man liwat na makakaeksperyensya an Bicol nin mga pag-uuran huli sa epekto kan nasambitang bagyo.
Huli man sa piglalaomang makusog na pag-uuran, nagpatanid man an opisyal sa huma kan landslide asin flashflood sa Catanduanes asin lahar flow gikan sa Bulkang Mayon sa Albay.
