Nangapodan si House Committee on Ways and Means Chairman asin Marikina Representative Miro Quimbo para sa sarong imbestigasyon sa naglalalang mahiwasang smuggling nin sigarilyo makalihis makumpiska an 32 na trak na kargado nin suboot smuggled cigarettes na nagkakantidad nin ₱2.6 bilyon kan Enero 1, 2026.
Huli kaini, nagsangat si Quimbo nin House Resolution 636 na naghahagad kan tulos na pagresponde kan appropriate committees nganing magsagibo nin imbestigasyon in aid of legislation.
Segun ki Quimbo, katampad kan ₱875.16 million na nawara na buwis an nakumpiskar na kargamento, asin patunay na nagtetenir na seryosong problema an ilegal na kalakaran nin sigarilyo.
Kan 2023, pigkakarkulong ₱25.5 bilyon an nawara sa excise taxes huli sa iligal na negosyo nin tabako.
Pigdoon niya na an smuggling an nagpapaluya sa mga sin tax reforms, nagpapababa kan presyo kan sigarilyo, asin nagpapadali sa access kaini, orog na para sa mga jovenes asin mga nagtitios.
Katuyuhan kan House Resolution 636 na repasuhon an pagpapaotob kan ley, koordinasyon sa mga ahensya, asin mga penalidad ngani na mas mapakusog an laban kontra sa smuggling asin magserbing basehan para sa mga bagong ley.
