LEGAZPI CITY – Naka-eksperyensya nin low water pressure hasta sa no water supply an nagkapirang barangay sa ciudad kan Legazpi pirang aldaw makalihis magsalida an taong 2026.
Segun ki Legazpi City Water District General Manager Rico Salazar sa intrevista kan Bombo Radyo Legazpi na an pagluya kan supply nin tubig an huli sa temporary suspension kan Bogña Well Field’s operations makalihis na magkaigwa nin power outage sa naunambitang lugar.
Huli sa paramientras na pagpapapundo kan operasyon an naapektaran an bulos kan tubig kan mga Barangay na nasa norteng parte kan ciudad arug kan Bogña, Pawa, Dita, San Joaquin, Matanag, Bagong Abre, Buyoan, Tamaoyan, asin Rawis.
Ipigdoon niya man na mantang nangyayari an temporary suspension, may mga nakastandby sindang mga personahes nganing magsagibo nin flushing operation sa mga apektadong lugar.
Plano man kan opisyal na maibitaran an mga kaparehong insidente sa paagi kan pagsasagibo nin memorandum of agreement sa pagultangan kan Albay Electric Cooperative na magkaigwa nin sadiring power source nganing dae na makipag-agawan an naunambitang water source sa mga residentes pag-abot sa kuryente.
Nagpasalamat man siya sa mga namamanwaan na padagos na nakakasabot asin nakikipagtabangan sa saindang lakdang nganing marikas na maibalik an water supply sa ciudad.
Paglilinaw ni Salazar na dae man nagpapabaya an saindang ofisina nganing magkaigwa nin permanenteng solusyon an problema sa tubig kan mga Legazpeño.
