Nakatalaang maghampang sa Manhattan federal court sa Lunes an Presidente kan Venezuela na si Nicolás Maduro.
Ini an kinumpirmar kan sarong opisyal gikan sa U.S. Department of Justice.
Si Maduro nahahampang sa manlaen-laen na kaso sa Estados Unidos, kabali na an conspiracy related sa narco-terrorism.
Nahahampang man sa mga kaso an saiyang agom, kabali an sabwatang may kinaaraman paglaog nin cocaine pasiring sa Estados Unidos.
Bago an saiyang enot na pag-hampang sa korte, si Maduro an matenir sa Metropolitan Detention Center sa Brooklyn.
An eroplanong lunad si Maduro asin kan saiyang agom naglapag sa Stewart International Airport, poco mas o menos 97 kilometro sa hilagang-kanluran kan New York City.
Makalihis na maglapag an eroplano, nagkapirang mga tawohan kan Estados Unidos na nakasulot nin may marka kan FBI asin iba pang ahensya an nagsakat sa eroplano.
Mientrastanto, dae pa malinaw kun pano an suboot plano ni US Pres. Donald Trump na pangasiwaan an Venezuela.
Sa presente, an mga pwersa kan Estados Unidos wara nin direktang kontrol sa nasyon, asin an gobyerno ni Maduro padagos na namamahala na warang malinaw na intensyon na makipagtabangan sa Washington.
Wara pang opisyal na pahayag an gobyerno kan Venezuela manungod sa pag-arestar sa saindang Presidenteng si Nicolas Maduro.
