LEGAZPI CITY-Bubuksan kan Local Government Unit kan Daraga Albay an saindang opisina sa Disyembre 29-30 para sa mga mawot maglakaw kan saindang business permit.
Segun kay Renz Luna an Spokesperson ni Mayor Victor Perete, sa intrevista kan Bombo Radyo Legazpi na isasagibo ini ngani mabawasan an gabat kan pagruso kan mga tawong nagbibisita sa munisipyo sa bulan kan Enero ngani makapag-renew kan saindang mga business permit o kan saindang mga establisimyento.
An lakdang na ini para sa mga residentes ngani diit na sana an saindang mga aasikasuhon sa pagabot kan bagong taon.
Mientrastanto, preparado na man an saindang lokal na gobierno para sa pagsabat sa bagong taon, siring man an nakabantay an saindang mga kapulisan sa anumang insidente.
Sinabi man kan opisyal na nagigin isyu man sa saindang lugar an mga residentes na mahilig maggamit nin paputok orog na an mga kajovenesan.
