Liwat na nangapodan si Pope Leo XIV na magkaigwa nin aldaw nin katoninongan sa bilog na kinaban, maski ngonian na Pasko pa sana, kasabay kan pagkamundag kan satong paraligtas na si Hesukristo.
Sa saiyang paghampang sa mga mamamahayag sa luwas kan Papal palace, sinimbag kan Santo Papa an nagkapirang hapot manongod sa giyera sa Ukraine.
Segun ki Pope Leo, saro sa saiyang labing ikinamundo ngonian na mga aldaw iyo an bagay na pagsayuma kan Rusya sa kahagadan para sa Christmas truce o ceasefire.
Katakod kaini, binuhay kan Santo Papa an saiyang pangapodan para sa ceasefire sa Pasko asin naglalaom na susunodon ninda an pangapodan na ini sa laog nin 24 oras o bilog na aldaw nin katoninongan sa bilog na kinaban.
Nagpahayag man si Pope Leo nin paglaom sa progreso kan peace agreement sa Middle East, kun saen presenteng pinag-oolayan an Phase 2 kan kasunduan.
Mientrastanto, dai maiwasan kan Santo Papa na ipahayag an saiyang pagkadisganar sa dai pa sana nahahaloy na pag-aprobar sa saiya mismong home state na Illinois kan assisted suicide para sa mga adult na may mga terminal illnesses o may prognosis na anom na bulan o mas hababa pa poon Setyembre 2026.
Tinawan duon ni Pope Leo an pangangaipo na irespeto an kabanalan kan buhay poon sa kapinunan sagkod sa katapusan, alagad sa kamondoan suboot, si Illinois Governor JB Pritzker nagdesisyon pa man giraray na pirmahan an lakdang, na iyo an rason kun nyata labi an pagkadisganar kan Santo Papa.
Katakod kaini, inimbitaran ni Pope Leo an gabos, partikularmente ngonian na Christmas season, na pagnilayan an nature asin kahalagahan kan buhay nin tawo.
Sinabi kan Santo Papa na an Dios nagin tawo siring sato nganing ipahiling sato kun ano an tunay na kahulugan kan buhay.
Kun kaya, paglaom asin pamibi kan lider kan Simbahang Katolika na an pagrespeto sa buhay nin tawo an magtalubo giraray sa kada oras, poon sa pagbados sagkod sa natural na pagkagadan.
