LEGAZPI CITY-Planong i-distribwir sa mga munisipyo sa provincia kan Catanduanes an nasa 19 rescue vehicles hale sa Department of the Interior and Local Government (DILG).
Segun kay Catanduanes Governor Patrick Azanza sa intrevista kan Bombo Radyo Legazpi na kada saro sa saindang mga munisipalidad an matatawanan asin an matatada ibabarewas sa mga may pinakadakulang pangangaipohan depende sa dakol kan populasyon asin sa sitwasyon sa lugar.
Ini an saro suboot sa programa kan DILG ngonian na taon, kun kaya sinikap kan saindang provincial government na matawanan ini nin pondo asin mai-award sa pronvincia.
Sa presente, nasa inspeksyon na an mga behikulo ngani mai-distribwir na sa mga munisipyo.
Sinabi man ni Azanza na dakulang tabang ini sa provincia huli sa pirmihan sindang naagihan nin bagyo.
Magagamit man ini bilang tabang enkaso kadakol an mga kaipuhan i-rescue, sa pagpapa-ebakwar, siring man sa para sa mga may helang na kaipuhan ilipat sa mga hararayong lugar.
Ipapanao an nasabing mga behikulo enkaso abilable na ini para sa distribusyon bago matapos an taon o sa masunod na taon.
Pagirumdom man kan opisyal ngonian na kapaskuhan na magin maingat sa pagselebrar asin ibitaran an anumang aksidente.
Mientrastanto, magpapaluwas man nin Executive Order an provincial government sa pagkakaigwa nin komposisyon sa paglista kan mga kaiba sa totally asin partially damages ngani magin maayos asin dai na makaresibe nin mga reklamo manungdo digdi.
