Ipinahayag ni Department of the Interior and Local Government Secretary Jonvic Remulla na pamilyar si dating DPWH Undersecretary na si Maria Catalina “Cathy” Cabral sa lugar sa Benguet kun saen siya nahulog, na harani sana sa overpriced rockfall netting project site na pig-iimbestigaran.
Segun ki Remulla, aram na marhay ni Cabral an lugar huli ta siya mismo an nag-aapruba kan mga proyekto kan DPWH, kabale na an pigkakarkulong ₱36-billion na rockfall netting project.
Ginibo kan kalihim an pahayag makalihis na magin palaisipan sa kadakol an koneksyon kan lugar sa pagkagadan ni Cabral.
An proyekto pig-iimbestigaran huli sa suboot overpricing.
Segun ki Baguio City Mayor Benjamin Magalong, ₱3,200 kada square meter an base price kan rock netting, alagad ₱12,000 kada kada square meter an singil sa gobyerno.
Dugang pa ni Magalong, piglalaoman na masangat nin criminal complaint an DPWH dapit sa nasabing proyecto, kun saen hale suboot an mga materyales sa sarong kumpanya na pagsasadiri kan tugang ni Benguet Rep. Eric Go Yap.
Naenot nang ininspeksiyon ni Presidente Ferdinand Marcos Jr. an nasabing project site kan Agosto.
Mientrastanto, pigbuyagyag man ni Remulla na si Cabral kalimitang nag-iistar sa Ion Hotel sa Baguio, na suboot pagsasadiri niya sagkod 2025 asin dae naghaloy an ipinabakal sa sarong tawong pigladawan na “best friend” ni Yap.
Mahigot na pinahimutikan ini kan Ion Hotel, alagad sinabi ni Remulla na padagos pa ining pig-iimbestigaran.
Padagos an imbestigasyon kan mga otoridad dapit sa pagkagadan ni Cabral asin sa mga alegasyon nin mga anomalya sa proyekto.
