LEGAZPI CITY – Nagtao na nin special permit an Land Transportation Franchising and Regulatory Board (LTFRB) Bicol para sa mga kadugangang bus na sasakayan kan mga pasahero ngonian na paparani na an kapaskuhan asin bagong taon.
Segun ki LTFRB Bicol Director Joel Defeo sa intrevista kan Bombo Radyo Legazpi na ini an saindang nagin lakdang para sa piglalaomang pagdagsa kan mga pasahero sa mga terminal sa Metro Manila na mauli sa manlain-laing provincia kan rehiyon.
Uminabot man sa 200 na mga bus an tinugutan magbyahe sa irarom kan naunambitang permit alagad pwedesir pa suboot ining madagdagan enkaso dae kayanon an pagruso kan mga byahero.
Afuera sa pagtatao nin mga special permit an nagkokondusir man sinda nin mga inspeksyon sa mga terminal asin units na nagba-byahe nganing masyerto an roadworthiness kan mga behikulo asin nganing magin salbado an mga pasahero.
Pigtaram pa kan opisyal na padagos na nakikipagkoordinar an saindang ofisina sa Philippine Drug Enforcement Agency Bicol para sa pagsasagibo nin mga surprise drug testing sa mga terminal.
Patanid niya man sa mga driver kan mga pampasaherong behikulo na magpopositibi sa mga surprise drug testing na pwedesir na maghampang an mga ini sa penalidad bako sana sa saindang ofisina kundi pati na man sa Land Transportation Office.
Pagirumdom ni Defeo sa mga driver na syertuhong nasa maray na kamugtakan an saindang mga behikulo partikulamente na an mga rida kan saindang behikulo huli ta pwedesir magresulta an mga ini sa pagkakansela kan saindang prangkisa.
 Bicol has issued a special permit for additional buses to be used by passengers as the Christmas and New Year approach.){kind=link}