LEGAZPI CITY-Pigrason kan International Crminal Court (ICC) Prosecutors na pig-peke suboot ni dating Presidente Rodrigo Duterte na may cognitive impairments siya ngani maibitaran an paglilitis kasunod kasong crimes against humanity laban sa saiya.
Sa siyam na pahina kan dokumento na pigsurat ni Deputy Prosecutor Mame Mandiaye Niang asin isinumiter sa Pre-Trial Chamber I kan Huwebes, sinabi kan Office of the Prosecutor na basado sa medical evaluations, nahiling na fit an dating Presidente na maghampang sa pre-trial proceedings.
Bilang resulta man kan iba pang mga test na ginamit sa pagbusisi sa salid kan dating Presidente, nagdesisyon an gabos kan tulong eksperto na “unreliable” an subjective complaints ni Duterte katakod kan saiyang salud asin mental functions.
Kasunod kaini, nagkasundo an mga eksperto “unanimously” na may kapasidad an dating Presidente na masabutan an mga kaso asin ebidensiya laban sa saiya, pati na an posibleng consequences kan pre-trial proceedings asin makapagtao nin instruksyon sa saiyang legal counsel.
Huli digdi, nangapudan an ICC Prosecutors na itakda na an pagpapadagos kan proceedings sa confirmation of charges kay Duterte.
Marurumduman na naenot nang ipigsugo kan korte an medical evaluation ni Duterte makalihis hagadon kan saiyang defense team an indefinite adjournment kan kaso kan Agosto ngonian na taon huli sa isyu sa salud kan dating Presidente kan Pilipinas.
