LEGAZPI CITY – Nakapreparar na an manhamiento kan Camalig Municipal Fire Station mapadapit sa mga serye nin kasulo asin iba pang klase nin insidente ngonian na holiday season.
Segun ki Camalig Fire Station Acting Municipal Fire Senior Inspector Warren M. Orendain, sa intrevista kan Bombo Radyo Legazpi na kabale sa saindang lakdang an pag-bandilyo kan saindang firetruck sa mga barangay nganing mag-impormar sa publiko manungod sa fire safety tips.
Padagos man an saindang pagmonitor sa mga barangay asin lugar sa saindang munisipalidad na pigdeklara komo fire prone area asin mga establisyementong pigdadagsa kan publiko.
Komon na nagigin kawsa kan kasulo sa saindang banwaan kan mga nakaaging pag-selebrar nin kapaskuhan asin bagong taon iyo an paggamit nin sub-standard na christmas light asin octopus connection.
Paliwanag pa kan opisyal na kadaklan sa mga nababakal ngonian na mga klase nin pailaw an maluya an klase, dae nag-agi sa pagsusuri asin pigpapa-agahan na nagigin kawsa kan mas dakulang perwisyong pwedesir makuwa.
Plano man ninda na magbugtak nin sarong lugar na idedesignar para sa mga matienda nin paputok para sa bagong taon nganing magin organisado an mga ini.
Makakasyerto suboot an publiko na makakaresponde sinda sa laog nin pitong minuto nganing magtaong asistensya enkaso kaipuhanon an saindang tabang.
Pagirumdom ni Orendain na maggamit na sana nin ibang klase nin paribok huli ta pwedesir man iselebrar an kapaskuhan asin bagong taon nin dae naggagamit kan mga ipinagbabawal na paputok.
