LEGAZPI CITY – Nagpatanid an Albay Provincial Health Office mapadapit sa mga helang na pwedesir makuwa sa mga pagbabaha na epekto kan mga makukusog na pag-uuran.
Segun ki Albay Provincial Health Office food and water borne diseases coordinator Anthony Ludovice sa intrevista kan Bombo Radyo Legazpi na pira sa mga pwedesir makuwang helang kan sarong tawo sa panahon kan tag-uran iyo an diarrhea, leptospirosis, dengue asin iba pang helang.
Permihan man suboot pakuluan an mga iinumong tubig urog na kun dae man syertong malinig an pigkukuwaan nin tubig ngonian na mauran an panahon nganing matanggal an mga bacteria na delikado para sa salud.
Pigsuhestyon niya man na tukduan nin maray an mga kaakian mapadapit sa tamang paghugas nin kamot antes pagkatapos magkaon o antes asin pagkatapos maggamit nin palikuran.
Pigtaram pa kan opisyal na permihang magdara nin payong o raincoat kun dae malilikayan na magluwas ngonian na mauran an panahon nganing makalikay sa helang na influenza o trangkaso na saro sa mga nakakahawang helang.
Ibitaran man an paglusong suboot sa tubig baha urog na kun may mga lugad mantang maghugas asin sabunon an bitis kun dae malilikayan na magluwas sa kaharongan asin maglusong sa baha.
Dae man pagpabayaan na nakatiwangwang ang mga basura na pwedesir na matambakan nin tubig na pwedesir pamugaran nin mga lamok na may dara nin helang na dengue.
Pagirumdom ni Ludovice sa publiko na kun nakamate na nin sintomas kan food and water borne diseases makalihis an pagka-expose sa pag-uuran, pagbabaha, asin kontaminadong tubig an dae magduwang isip na magrani sa mga magkakanigong ahensya nganing malikayan an anumang peligro.
